Friday, February 3, 2012

PANGUARTAAN MET TI DI MAUS-USAR A PAPEL

Kalpasan kadi ti pangaldawyo, Komari, pagpalpalpaam kadi ti agbuya iti telebision a nakailad iti sopa wenno butaka? Aysus, iti daytoy a rumigrigat latta ti panagbiag, Komari, agpanunotka ketdi iti nayon a pamastrekam. Kayatko a sawen, nupay agbuybuyaka iti “Wowowee” wenno “Eat Bulaga”, adda koma ob-obraen dagita imam. Kas iti dadduma a lallakay iti kailokuan a pagpalpalpaanda ti agaramid iti alat, baki, pagsagatan a kawayan, ken balingato. Wenno kas met iti dadduma nga inna a pagpalpalpaanda ti agkayas iti bulong ti niog nga aramiden ken ilakoda a kas kaykay wenno sagad.

Adu dagiti maaramidmo, Komari, ngem padasem man ti inaramid ‘toy dati a gelprenko – ta asawak itan, No kastan a malpaskami a mangan ken makainnawen wenno awanen ti ubraenna ken mairubbuatanna dagiti ubbingmi a mapan eskuela, iruarnan dagiti usarenna nga agaramid iti papel a flower vase wenno plorera: papel ken kartib.

Kastoy ti aramidem, Komari: Mangkartibka iti adu a papel a di maus-usar. Uno por tres pulgada ti rukod ti kada maysa a piraso. Kulpien iti paatiddog ti maysa a piraso. Kulpien manen iti tengnga ti umuna a nakakulpianna tapno agbalin a kuntirad. Kulpien manen dagiti agsumbangir a baba ti kuntirad tapno agbalin a tallo a kuntirad. Kulpien manen nga ipangato manipud iti tirad iti kanawan agingga iti tirad iti kanigid tapno agbalin a trianggulo. Kulpien manen manipud iti tirad iti ngato agingga iti tengga iti baba tapno agbalin a bassit a trianggulo. Agaramidka iti adu a trianggulo, Komari.

Makita nga iti maysa nga iking ti trianggulo ket adda dua nga abut. Adda met dua a kuntirad ti nakulpi a trianggulo. Ita, pagabayen ti dua a trianggulo sa isulbong ti dua a kuntirad ti maikatlo a trianggulo iti dua nga akintengga nga abut. Kasta a kasta agingga nga agtimbukel depende iti kayat a kalukmeg ti flower vase nga aramiden. Sulbongan iti dadduma pay a trianggulo tapno tumayag, Komari. Mabalin met nga ikkan iti dadduma a disenio (kitaen dagiti dadduma a ladawan). Ikkan iti napuskol a papel iti sirok ti flower vase. Barnisan inton malpas, Komari, tapno tumibker.

Presto! Addan flower vasemo a naaramid iti papel, Komari. Saan laeng a dayta ti mabalinmo nga aramiden, Komari. Mabalinmo pay ti agaramid iti pagidissuan iti selpon, wenno pagyanan iti bolpen, lapis, stapler wenno kartib. Mabalinmo nga ilako ti flower vase nga agtayag iti pito pulgada iti sangagasut a pisos wenno nasursurok. Di kad’ addan sangakilo a tilapia wenno kabalias, Komari. Ket no nagbuybuyaka la iti tv a nakatugaw, awan dayta a sidayo.

No kayatmo met ‘tay bukodmo a disenio ti marisna gumatangka iti spray paint nga usarem. Agduduma ti marisna no isu ti kayatmo. Apaman a bumaybayag masursuromton ti agaramid iti nadumaduma a porma ti flower vase. Ket wen, no makaaramidka iti agtayag iti innem a kadapan a flower vase a naaramid iti papel, amangan no mairamankanto iti Guiness Book of World Records, Komari.

Ala, wen, bay-amon dayta a Ginis. No makaaramidka iti pagsidsiddaawan dagiti makakita, madika pay? Ket gapu laeng dayta iti di maus-usar a papel! - 0

Naipablaak iti Bannawag idi Pebrero 22, 2010

MAIN PAGE

No comments: