Saturday, June 2, 2007

Convention Field Trip Daytoyen, ‘Giem (Suso Beach)

SAANAK a nagbabawi iti iyaatendarko iti kombension a naangay iti Suso Beach, Santa Maria, Ilocos Sur itay napan a tawen gapu iti agdindinamag a baybayna. Kangrunaanna, ti pannakakitak ken pannakalamanok ken ni dati a First Lady Imelda Marcos! Kasta met a nakitak ni Gob. Chavit Singson. Dayta, impadamagko manen kadagiti kakabsatko.



Bigat ti maudi nga aldaw ti kombension, naglugankami iti traysikel kada Apo Raquelito Cenal ken Apo Lakay Fabian tapno mangankami idiay sentro. Sabali met a traysikel ti nagluganan da Apo Tony Urata ken Apo Teody. Ti dakesna naudi ti naglugananmi ket saanmin a nasurotan da Apo Teody. Ngem pagsiaatanna, dimsaagkami idi makitami ti nagdakkel ken kadaanan a simbaan a maysa a heritage site ti Santa Maria. Adtoy manen, kinunkunak iti unegko a ti panagpasiarmi ti kayatko a sawen. Kasla nailasagmi ngaminen ken Apo Lakay Fabian ti agpasiar no umatendarkami iti kombension. Iti pay laeng igid ti kalsada a babaen ti simbaan agkaragilapen ti kamerami.

Iti pay abay ti kampanario. Anian ta nagdaeg ti simbaanda!

Idi lumaksidkamin iti simbaan kalpasan a nalawlawmi, apagisu met a makitami ti barito a katulongan ngata iti simbaan. Nakisaritakami a sirpatenmi la bassit ti uneg ti simbaan ket yamanenmi unay ta pinatgannakami. Di kam’ pay napnek ket inulimi ti kampanario. Permi ti ragsakmi nangruna ken ni Apo Raquelito idi aggilap manen ti kamerami. Nagragsak gayam ti maki-convention fieldtrip, kinunana. Damdamona ngamin ti umatendar. Saan la a naragsak, nakaragragsak, insungbatmi met. Agasem, taga-Cagayankami ket naulimi ti kampanario ti maysa a dakkel a simbaan ti Santa Maria, ‘Giem!

Iti malem, aglugankami koman iti bus a naglugananmi nga immatendar idi awisennakami ni Apo Bokal Vilmer Viloria nga aglugan iti kotsena. Ti ammomi kada Raquelito ken Apo Lakay Fabian ket sumarunokami met laeng iti bus isu a simmurotkami kadakuada. Anta gayam, napankami idiay Caoayan, Ilocos Sur, iti pagtaengan da Apo Edwin Querubin a kasinsin kano ni Apo Bokal. Ditoy a pinangrabiinakami iti resthousena. Kaduami da Apo Gladys Menor, Apo Editor Diony Bulong ken da Apo Teddy Molina ken dadduma pay. Nagganas man ti agdalupisak kadagiti nagdadakkel a bato iti paraangan ti resthouse idinto nga im-imatangam ti iruruar ti naubing pay ken nalabaga nga init iti adayo a paset ti agan-anasaas a baybay.Kabigatanna, napalaus ti ragsakmi idi impasiarnakami ni Apo Querubin iti Baluarte ni Apo Gobernador Luis ‘Chavit’ Singson. Saanen a kombension daytoy, kinunkunami. Field Tripen! Ngem, gapu daytoy iti kombension!

Kalpasanna, impasiarnakami iti pagtaengan ni Apo Teddy Molina. Impasiarnakami met ni Apo Molina iti Siudad ti Vigan. Agasem, nangankami pay iti agdindinamag a Flores de Mayo! Ken linawlawmi pay dagiti kadaanan nga estraktura ti Vigan.

Manen, napanunotko a no diak immatendar iti kombension diak koma nakita dagitoy, Kapid!

ITAY Disiembre a pannakaipabuya ti Panday iti telebision, namin-adu a miningmingak ti ladawanmi idiay simbaan ti Santa Maria. Isu! Kinunkunak. Saanak pay la a napnek ket basta mangrugin a maipabuya, alaek metten ti ladawanmi tapno ikomparak. Ket isu a talaga ti simbaan ken ti kampanario nga inulimi, ‘Giem! Kampanario a nakaitugkelan ti espada ni Panday! Dayta, impadpadamagko kadagiti kakabsatko ken kadagiti kalugarak! Gapu dayta iti kombension ti GUMIL kinunkunak!Kitaem la a talaga ti gasgasattayo, kinuna met ni Apo Lakay Fabian a nangiruar iti kape idi napanmi pinasiar ken Apo Cenal iti dormitorio ti CSU Sanchez Mira.Gapu dayta iti convention field trip ti GUMIL, arig naggiddan a kinunami ken ni Apo Cenal.

Wen, ‘Giem, naragsak a talaga ti makikombension! Ita, pampanunotek, dakkel nga utangko daytoy iti GUMIL!

Convention Field Trip Daytoyen, ‘Giem (Viva Intramuros!)

NO DIAK koma immatendar iti kombension idi 2004 sadiay Intramuros, Manila, adayo koma a digo a nakitak ti Walled City! Malagipko ti ipupuslitmi kada Apo Virgilio Naungayan, Apo Danilo Antalan, ti grupo ti Gumil Isabela, ken ni Apo Lakay Fabian a nagbalin a guidemi, iti daydi a bigat sakbay a mangrugi ti programa.
Diak naaluadan ti nangi-send iti message kadagiti kakabsatko idiay California idi rumuarkami iti museum ni Rizal gapu iti ragsakko. Wen, nakitak dagiti Obra Maestra ni Rizal, dagiti inus-usarna ken dagiti tugotna sakbayda a pinaltogan, ‘Giem!
Linawlawmi pay ti pader ket ditoy a nakitami dagiti kanyon, a batonlagip kadagidi bannuartayo a nangibuis ti biagda a nangsalaknib iti pagiliantayo.
Nakitami pay ti pasdek ti Manila Bulletin ket nagestoria ni Mang Rodel Ramos ti panagubrana sadiay. Naglugankami pay iti kalesa.
Agasem, naserrekko pay ti National Press Club, ‘Giem! Sadiay ngamin ti nakaangayan ti kombension. Ditoy pay a nakitak dagiti staff ti Bannawag kas kada Apo Prodie Gar. Padios, Apo Cles B. Rambaud ken Apo Juan Al. Asuncion (sakbay ti kombension idi 2003, nakitakon ni Apo Editor Diony Bulong iti maysa a seminar idiay Gattaran, Cagayan).
Manen, iti yaawidko idi iti Cagayan, nagbati ditoy panunotko a ti kombension ti gapu no apay a napasiarko dagitoy! Adu manen a kapadasan ti nainayon kaniak!
(adda tuloyna)

Convention Field Trip Daytoyen, ‘Giem (Callao Caves)

(Naukagak daytoy idi rabii kadagiti files ti computerko ket adtoy ita nga innak iburay kenka, 'Giem. Anusamon nupay nabayag bassiten a napasamak daytoy.)

No tumapogen ti bulan ti Marso, agsagsaganan ni mannurat iti yaatendarna iti tinawen a kombension ti Gumil Filipinas, Gunglo dagiti Mannurat nga Ilokano iti Filipinas, a kadawyan a maangay iti bulan ti Abril. No kasano ti regget dagiti damona ti agatendar, kasta met ti gagar dagiti kada tsapter nga umatendar sadino man ti pakaangayan ti kombension. Maganatan metten dagiti nakisalip, iti sarita, salaysay wenno daniw, a mannurat a makaammo iti resulta ti pasalip a nangilabananda iti gapuananda. Apaman a maammuan ti resulta dagiti pasalip, no mabalbalin koma, pikarenen dagiti nangabak ti panagtulid ti aldaw tapno umawatdan iti plake wenno sertipiko ken kuarta manipud kadagiti naayat ken di mauma a mangsupsuporta iti irarang-ay ti Literatura Ilokana babaen ti panagpasalipda. Kasta met dagiti mannurat nga adda mailako a libro.


Maysa pay a gapu no apay a maganatan dagiti mannurat nga umatendar iti kombension ket tapno makapagiinniliwda iti tunggal maysa. Kasta met a tapno makasakdoda manen iti adal manipud kadagiti lecturers ken kadagiti makapatangda. Saan met a mailaksid ti panagpasiarda iti ruar ti kombension aglalo no dida pay nakapan iti dayta nga ili.

Kaniak a biang, dua laeng idi ti rason no apay a nagatendarak idi iti maika – 35 a kombension. Umuna, tapno makita ken maalamanok dagiti pagrukbabak a mannurat. Maikadua, tapno makapasiarak iti dayta a lugar.

Wen, nabayagen a kayatko idi ti umatendar iti kombension tapno makitak met dagiti agkakapintas a lugar a pakaang-angayan ti kombension. Agkakapintas kunak ta kalpasan ti dua wenno tallo a lawas rumuaren ti resulta ti kombension iti bannawag. Ngem saan a natultuloy gapu iti adu a rason. Isu’t gapuna nga idi maammuak iti Bannawag nga iti Callao Caves, Penablanca, Cagayan ti pakaangayan ti maika – 35 a kombension, kinunak iti bagik a masapul nga umatendarak! Makitak met laengen ti maipagpanpannakkel ti probinsiami a Cagayan, ti Callao Caves, kasta met dagiti pagraemak a mannurat.

Kaasi ti Apo ket nakaatendarak. Nagkuyogkami ken ni Apo Freddie “Lakay Fabian” Masuli nga immatendar. Diak pulos malipatan daydi panagbuyami kadagiti panniki nga agsangpet iti agsapa ken tumalaw iti agsipnget. Ti panagisaraksarak da Apo Jobert “Teody” Pacnis, Apo Freddie Masuli ken dadduma a mannurat iti signal ti selponda iti nangato a paset ti lugar. Ti panagulimi iti nasurok dua gasut a pangal tapno magtengmi ti kueba ken ti panagluganmi iti barangay a napan idiay Mauroran. Ti panagserreserrekmi kadagiti kueba. Dagiti met dadduma, napanda simmuknal ken ni Apo Baket ti Piat iti maudi nga aldaw ti kombension.

Iti panagawidmi, napampanunotko a karkardayo koma a nakita ken nalamanok ni Apo Carlos Padilla, Jr. ken nakapanak iti Callao Caves no awan kombension!

Friday, May 25, 2007

BIERNES TRESE IDIAY GUMIL

Salaysay ni Raquelito B. Cenal

ABRIL 13, 2007. BIERNES.
Gagangay nga aldaw ti panagriknak iti dayta a petsa, ‘Insin, ta saanko a napampanunot a dagus a dayta nga aldaw ket Biernes Trese a kunada. Adu ti agkunkuna, ‘Insin a malas ti kasta nga aldaw, ngem mamati kadi met?
Siak man ti dandani namati a talaga a malas dayta nga aldaw, ‘Insin, idi maturogakon iti dayta a rabii a napanunotko dagitoy a napasamak kaniak iti dayta a nagmalem. Dumngegka . ‘Insin, ta estoriaek…
AMMOM met siguron, ‘Insin, a dayta nga aldaw ti panangrugi ti maika-39 a Kombension Nasional ken Literary Seminar ti GUMIL Filipinas a naangay idiay Currimao, Ilocos Norte. Nagtulagkami babaen iti text ken kumpad Freddie Masuli) a dagasenmi ida kada Kumpad Roy Aragon) ken Mang Jaime Oandasan) nga imian idiay dagusda iti Cagayan State University-Sanchez Mira Compound (CSU-SM). Naggapu ngamin ni Kumpad Roy idiay Tuguegarao City ket iti met Sta. Teresita ken Mang Jaime.
Ti tulagmi, ‘Insin, aglugankami (kaduak ni Rose Ann, ti buridekmi nga agpa-Badoc met) iti bus nga agpa-Claveria a pangdagasanmi kada Board Member Vilmer Viloria ken Manang Ena a baketna tapno makilugankami kadakuada.
KET adtoy ti umuna a kinamalas, ‘Insin:
Iti nasurok a maysa nga oras a panaguraymi nga agkabsat, saanmi met la maurayen daytay bus a nagtulaganmi a pagluganan. Diak met ngarud makontak ni Kumpad Freddie tapno ipakaammok koma nga aglugankam’ lattan iti sabalui a bus. Adu a text ti naipatulodko, ‘Insin, ngem kasla naisalatda amin kadagiti bulbulong ti kayo ta awan pulos ti naurayko a text backna kaniak.
Nagdesisionak ngarud, ‘Insin, nga aglugankam’ lattan iti diep a mapan idiay CSU tapno nasigsigurado nga agkakalugankam’ met lang.
Nadanonmi idan a tallo nga ugur-uray idiay waiting shed iti sango ti pagadalan, ‘Insin ket naammuak idi agangay nga awan load ni Kumpad Freddie ken imbatina ‘diay selponna kenni baketna isu a di nagte-text kaniak.
Nagdiepkami manen a nagpa-Claveria. Dinagasmi met ni Ira, estudiantek iti Sanchez Mira National High School a pangisuruak, a kaduami pay a makigumil. Innemkami ngarud a nakilugan iti Revo ni Boss Vilmer (nasinged nga awagko ken BM Vilmer Viloria).
DAYTOY met ti maikadua a kinamalas, ‘Insin:
Mayat met ti kondisionmi a nagrubuat, ‘Insin, ta malaksid a nalawa iti lugan pinagkapenakami pay nga immuna ni Boss sakbay a naglugankami ngem idi dumanonkami idiay Patapat, Pagudpud, in-inut a naulawkami (Freddie, Roy, Jaime, ken siak). Napalalo a kantiaw dagidiay babbai a kaduami, ‘Insin, (Rose Ann, Ira, ken Manang Ena). Kapilitan nga insardeng ni Boss ti lugan idi dumanonkami idiay Bangui Viewdeck a pakatan-awam, ‘Insin, kadagidiay windmillsda. Madi ta madi latta ngamin ti riknami.
Apaman a nagsardeng ti luganmi, inalistuak ti bimmaba manipud iti likod a paset ti lugan ta talagan a madi ti riknak, ‘Insin, urayko la nadalapus ni Mang Jaime a dumna iti ridaw. Ket intugawko iti maysa a suli iti ruar ti viewdeck tapno igaok ti sakit ti nakemko. Makais-isemka met, ‘Insin.
Kalpasan ngata ti duapulo a minuto, nagluaskami manen a kabunggoymin ti nagluganan ti Gumil Cagayan iti panangidaulo ni Mang Arthur Urata. Madi latta ti riknak ta agkakapsutak iti ulawko ngem ketdi diakon makadul-ok.
Alas 12:30 ngata idi dumanonkami idiay Ernesto G. Go Mega Complex a nakaangayan ti Kombension, ‘Insin.
NAITAYABEN ‘tay kinamalasmo, ‘Insin, kunam ngata ngem adtoy pay ti maikatlo:
Apagbabami iti lugan natan-awandakamin da Kumpad Dexter(Fabito) ken Kumpad Jobert(Pacnis) a nangipayapay iti pingganda.
Simrekkami ngarud tapno inkam’ koma agparehistro ngem pinagpiladakam’ met nga immunan iti panganan. Nakaalaakon iti kanek, ‘Insin, ngem idi tan-awak ti pagyanan ti pepsi umanay laengen a para ken Ira a sarsarunuek. Sumanamtekak a nakiragup kadagidiay kinaluganak. Pagpiaanna, ‘Insin, ta inyam-ammonak ni Kumpad Jobert iti maysa a balasang, ni Emy Rose Pedronan, nangabak iti umuna a gunggona iti salip ti salaysay para kadagiti estudiante ti kolehio. Ngem saanko unay a nadlaw ti pintasna kadaydiay a kanito, ‘Insin, gapu ngata iti bisin ken ulawko.
Idi malpas ti pangaldaw, nangrugi ti panglukat programa, ‘Insin. Napankami met nagparehistro kabayatan ti innalamano kadagiti kagumilan.
Kalpasan a nakarehistrokami, madama idin ti innadal maipanggep iti saribitniw, ‘Insin, innalami dagiti bagmi manipud iti lugan ni Boss ket napankami iti kuarto a pagdagusanmi a taga-Cagayan.

DAYTOY ti maikapat a kinamalas, ‘Insin:
Immuna a napankami iti Currrimao Central School iti bangir ti kalsada manipud iti Mega Complex. Nakitami ti kuarto a namarkaan iti GUMIL CAGAYAN ngem awan met dagiti mausar a pagturogan, ‘Insin. Napanko ngarud inayaban ni Kumpad Dexter iti Mega Complex ket iti kuarto a nagturoganda ken Kumpad Jobert iti napalabas a rabii (Huebes idi simmangpetda) ti nangibatianmi kadagiti kargami. Nagsublikami iti pagseminaran ngem arigna awan pay nangegmi, ‘Insin, inayabannakami ni Mang Arthur ta yakarmi kano dagidiay kargami. Masulitak koma ta medio adayo ti pagnaen abusta maulawak pay lang ken nasakit ti napaligi ken lumteg a kannawan a sakak ngem awan mabalin, ‘Insin.
Nalawa met ketdi ti kuarto a nagakaranmi, ‘Insin, abunaw pay ti danum ngem awan ti bentiladorna ken dagiti ramit nga agdigos kas iti timba ken tabo. Bayagmi met la ketdi a nangibaga kadagiti maseknan addan ti dua a dadakkel nga electric fan kasta met dagiti timba ken tako.
ITI PANAGSUBLIMI iti pagseminaran, madam nga ipakpakaammoda ti maipapan iti On the Spot Poetry Writing Contest nga addaan iti tema a kas iti tema ti kombension – Karit ti Literatura ni Ilokano: Napalabas, Agdama ken Masanguanan. Masapul a buklen daytoy ti 20 a binatog ken maited iti secretariat iti di naladladaw ngem alas 9 ti rabii.
Nabingay ti pasalip iti dua a kategoria – para kadagiti agdadamo ken para kadagiti bangolan.
Agsipudta maulawak pay lang uray idi malpasen ti pangrabii awan iti panunotko ti mangikur-it iti daniw, ‘Insin. Kimitak ti aglawlawko, kasla adda bukod a lubong ti tunggal maysa a manarimaan nga agikur-it.
Ket kasla kinuldingnak ti apal a kunana, “Abusman pay ta awan ti awatem a premio madamdama dimo la padasenen ti mangikur-it? Kitam dagiti kumpadmo: ni Jobert, umuna a gunggona iti daniw ti RFAAFIL; ni Roy, maikatlo a gunggona iti daniw ti RFAAFIL; ni Freddie umuna a gunggona iti AVAIL ken maikapat iti sarita ti Sta. Rafaella Ilokano Community Literary Awards; ni Dexter, maikatlo iti AVAIL; ken ni Emy, umuna agunggona iti salaysay.”
Kadaydi a kanito a nalagipko ti balasang nga inyam-ammo ni Kumpad Jobert. Sinapulko ida ta impasurotko gayam, ‘Insin, ni Ira, idiay kuartoda a babbai. Nakitak ida iti pagtutugawan iti likod a nayariping iti semento a diding ti complex – agsursurat met iti daniw, ‘Insin!
Kinitak ti selponko. Adda pay pito a minuto sakbay ti alas nuebe! Mangikur-itak! Kunak iti bagik, ‘Insin. Nagpakniak ngarud iti kangatuan a tukad ti agdan a makannawan iti likod a paset ti Mega Complex no sumrekka. Kasla apagapaman a napukaw ti ulawko.
Madaman nga agbilbilang iti sangapulo ni Mang Mario Tejada para iti panagrikep ti panangited iti manuskrito nga isalip, idi rugiak ti tumaray manipud iti agdan nga ‘yanko, numona ta nasakit ti sakak, ‘Insin! Apagisu a makabilang iti sangapulo idi maiyawatko ti manuskritok a para agdadamo. Umanal-alak a nagsubli iti likod nga ‘yan dagiti agkakatawa a kabunggoyak ta dida impagarup a sumalipak pay. Kimmaron sa ti ulawko, ‘Insin, iti panagtarayko kasta met ti ut-ot ti sakak.
Idi nangrugi ti panagited iti sertipiko ken premio dagiti nangabak kadagiti nadumaduma a pasalip, siak ti nagbalin a retratista, ‘Insin, ta siak met la ti awan premio nga awaten, piman. Sapay la kantiawannak ni Angkel Miks (Arnold Pascual Jose) nga awankan’ ti laingko ta diak nagpaadbays kenkuana (Palanca Awardee met ngamin ‘suna).
Kabayatan ti awarding, saan latta met a maungpot ti innestoriami ket dimi la ket ngarud napupuotan a madaman nga iwarwaragawagda dagiti innem a finalist ti On-the-spot Poetry Writing Contest iti benneg ti agdadamo. Nagangayanna, ti laeng 69 a maudi a paset ti parbo a naganko a lastminute69 ti nangegko, ‘Insin.
Diak mailadawan ti ragsakko iti dayta a kanito, ‘Insin, ta uray diak pay ammo ti puestok umanayen a nairamank kadagiti nangabak a mangibasa kadagiti daniwda iti kabigatanna tapno idiay a maamuan ti ranggo ti tunggal maysa. Napalalo a yamanko iti Dios, ‘Insin.
Daydiayen ti maudi a paset ti programa kadaydi a rabii. Ket sakbay a nagsisinakami kadagiti babbalasang, kinulitnak ni Ira no nairamanak kadagidiay finalist. Pinadasko nga inlibak ngem nakulit a talaga nga ubing isu a napilitanak a nangibaga iti pudno.
Inal-alamanodak da Ira ken Emy. Daksanggasat ngamin ti insalip ni Emy ta naabak, ‘Insin. Nariknakon kadaydi a kanito ti bara dagiti nalamuyot a dakulapna ken nakitak ti nagpaiduma nga isem kadagiti matana. Banag a pinampanunotko a nagpatnag bayat iti panangbasbasak iti daniwko.
Alas tresen iti parbangon a nakaturogak, ‘Insin! Kadaydi a kanito a napanunotko a Biernes Trese gayam kadayta nga aldaw ket nalagipko amin a napasamak kaniak iti dayta a nagmalem – napintas man ken naalas. Inkarik met iti bagik nga isalaysayko kenka dagitoy, ‘Insin.
KABIGATANNA, inawatko ti maikadua a gunggona iti On-the-spot Poetry Writing Contest iti benneg ti agdadamo agraman ti P700.00 a premio, ‘Insin!
Napalalo a ragsakko, ‘Insin, ta malaksid a nakagun-odak iti gunggona kadaydi nga aldaw ka-textko pay ni ading balasang kabayatan a sursuratek ‘toy salaysayko!
Ita, ‘Insin, mamatika pay lang a malas ti Biernes Trese?

Tuesday, April 3, 2007

Pacnis, Nangabak iti Salip iti Daniw ti 5th RFAAFIL

Adtoy pay ti natabukolak, Kapid iti pagtaengan ti rfaafil. Kongrats metten kadagiti nangabak. NOTE: Ken 'tayto pinapaitan, a, idiay Currimao. He he.

INYALAT ni Jobert M. Pacnis ti Ballesteros, Cagayan ti Umuna a Gunggona iti Salip iti Daniw, iti tema nga ayat, ti Reynald F. Antonio Awards for Iluko Literature (5th RFAAFIL) babaen ti daniwna a “Sapulem ti Kulluong.” Nalpasna ti Bachelor of Science in Electronics and Communications Engineering iti Cagayan State University – Tuguegarao City. Agdama a mangisursuro iti Northern Cagayan Colleges Foundation, Inc. (NCCFI).

Maika-2, Aurelio S. Agcaoili ti Hawaii, U.S.A. babaen ti daniwna a “Barangabang.” Mabigbig ken premiado a mannarita ken mannaniw. Mangisursuro iti University of Hawaii – Manoa, Hawaii, U.S.A..

Maika-3, Roy V. Aragon ti Tuguegarao City, Cagayan babaen ti daniwna nga “Essem.” Naipasngay iti Dupax del Norte, Nueva Vizcaya ngem agnaed ken ti pamiliana iti Cagayan. Agpapaay a kas Computer Specialist iti St. Paul University – Tuguegarao City.

Maika-4, Benjamin P. Pacris ti Bantay, Ilocos Sur babaen ti daniwna nga “Independencia Y Revolucion.” Maysa a radio announcer, journalist, lecturer kadagiti Literary ken Journalism Seminars ken chief information officer iti Philippine Information Agency iti Ilocos Sur. Nagpaay a kas Manager iti PIA iti Ilocos Norte ken Laoag City. Nag-presidente iti GUMIL-Ilocos Sur ken agdama a Business Manager iti GUMIL-Filipinas.

Maika-5, Prodie Gar. Padios ti Alberta, Canada babaen ti daniwna a “Kudos iti Ayatmo iti Bukodtayo a Dila.” Dati a Literary Editor ti Bannawag. Tubo ti Simpatuyo, Sta Teresita, Cagayan ngem agnaed agraman ti pamiliana iti Red Deer, Alberta Canada. Agtrabaho ita iti Red Deer Advocate ken iti Capri Hotel iti pused ti Red Deer.

Raras, Nangabak iti Salip iti Sarita ti 5th RFAAFIL

Adtoy man ti natabukolak, Kapid iti pagtaengan ti rfaafil. Kongrats metten kadagiti nangabak. NOTE: Ken 'tayto pinapaitan, a, idiay Currimao. He he.

NI Jaime G. Raras ti Candon City, Ilocos Sur ti nangyalat iti Umuna a Gunggona iti Salip iti Sarita, iti tema nga ayat, ti Reynald F. Antonio Awards for Iluko Literature (5th RFAAFIL) babaen ti saritana a “Basikaw, Pagutpot, Sukdip.” Mangisursuro iti University of Northern Philippines – Candon City. Agdama nga Editor ti UNP Candon Research Bulletin.

Maika-2, Prodie Gar. Padios ti Alberta, Canada babaen ti saritana nga “Imeng ken Anglem iti Sakbibi ti Niebe.” Dati a Literary Editor ti Bannawag. Tubo ti Simpatuyo, Sta Teresita, Cagayan ngem agnaed ita agraman ti pamiliana iti Red Deer, Alberta Canada. Agtrabaho ita iti Red Deer Advocate ken iti Capri Hotel iti puseg ti Red Deer.

Maika-3, Aurelio S. Agcaoili ti Hawaii, U.S.A. babaen ti saritana nga “Ayat iti Panawen ti Ariangga.” Mabigbig ken premiado a mannarita ken mannaniw. Mangisursuro iti University of Hawaii - Manoa, Hawaii, U.S.A..

Maika-4, Aida C. Tiama ti Asingan, Pangasinan babaen ti saritana a “Yna.” Administrative Officer IV ita iti maysa nga opisina iti U.P. Diliman a nakagun-odanna iti Most Outstanding U.P. Supervisor. Editor-in-Chief iti The Supervisor, ti opisial a publikasion ti U.P. Supervisors Association, Inc., a nagserbianna a kas Press Relations Officer manipud 1991 agingga 2005 ken nakagun-odanna ti U.P. Oblation Award gapu iti mapangnamnamaan a serbisiona a kas PRO.

Maika-5, Reynaldo A. Duque ti Candon City, Ilocos Sur babaen ti saritana a “Panagbukar.” Premiado a mannurat ken dati nga Editor-in-Chief ti Liwayway. Daytoy ti maikadua a saritana a mapadayawan iti pasalip ti RFAAFIL.